香港新浪網 MySinaBlog
« 上一篇 | 下一篇 »
太政高僧 | 2nd Dec 2010, 16:06 | 月旦 | (56 Reads)
我本來已經反對申亞,用60億(到時會唔會超支,天曉得)辦個亞運,就可以提升香港國際地位?提高形象?呢D不知所謂的借口,小學生都可以反駁,曾局長根本就係愚弄香港人的智慧。今日再經歷一件事,更令我相信申亞是「禍國殃民」的「暴政」。

今日同個好朋友傾電話,佢媽媽因為頸椎有問題入左醫院。問題係,今次入院對於佢黎講,可以話係一次「痛苦」的經歷。上午8點多,call非緊急救護車,到醫院9點,排隊照X光,兩個半鐘。照完之後又要俾物理治療師「評估」,之後又要等床位,辦手續,到佢媽媽瞓落病床,已經係晚上9點,足足12小時!仲要排隊照MRI!

在電話中,佢火都黎埋,不斷批評香港的公營醫療。OK,此乃人所共知的事,但之後的一返說話卻深深感染我,「政府有錢搞亞運,但無錢搞醫療。當佢亞運60億搞掂唔超支,用呢60億去外地請醫生返公立醫院做,買多D器材唔得嘅,一定要去搞亞運?唔好玩喇」。

由300多億,減到百多億,再減到60億。俾人的感覺係,「曾局長見D人話錢多,我咪減D錢等立法會過」。明顯就係「為通過而減預算」,結果就係到時一定超支,係一種極不負責任的行為。為政者唔一定要做「大事」,好多與民生相關的「小事」更應該做。

黃金寶其實無錯,亦無俾人「擺上台」。站在運動只的立場,佢當然希望有多D設施同訓練場地俾運動員用(唔單止係單車,應該所有運動項目亦如是)。但政府的思維就係,「要舉辦大型運動會,我先興建設施」。加上運動方面的撥款,又是「獎牌優先」,本末倒置,想香港好就難。

為下一代著想,唔好搞亞運。 


[1]

最大的隱憂還是預算方面,政府興建南區支線,幾年間已經超支8成,若果是舉辦亞運,現在尚有13年,我不敢想像到時會超支幾多,除非港幣大帳升值便另作別論,但根本沒大可能。

丹尼士文摘
[引用] | 作者 丹尼士文摘 | 2nd Dec 2010 16:47 | [舉報垃圾留言]