香港新浪網 MySinaBlog
« 上一篇 | 下一篇 »
太政高僧 | 26th Nov 2010, 17:09 | 玄學館 | (173 Reads)
吾友A小姐,因為在辦公室得罪人,搞到被全office的人針對,份工亦做到極唔開心。成日同朋友訴苦(我都係其中之一),但因為人工高、而且在可預見的將來都唔會俾人炒,所以佢家人唔想佢辭職,當然,佢自己有諗過,作為朋友的我亦叫佢辭職。有一次佢同手帕交B小姐提到自己的遭遇,咁岩,B小姐亦因為工作上的問題(唔係俾人針對,而係想更上一層樓),搵到一位風水師幫佢擺陣。由於該風水師同B小姐算命準,而且該陣亦有效,於是就將風水師推薦俾A小姐。風水師聽完A小姐陳述之後就話:「妳的問題好嚴重,在辦公室擺陣已經無用,要在自己家中擺陣先得」。

A小姐聽到咁講,就在當晚打電話俾我,講呢件事我知,並問我意見。我答:「我的興趣係政餘星學同易經,風水非我所長,自己亦無研究,唔敢妄加評語。如果B小姐向妳推薦,佢又認為有料,妳一試無妨」。之後A小姐意託B小姐幫佢約師父,順便問價。

半小時後,A小姐再次打俾我,講:「師父話收$580,並且要自己用指南針測方向、俾地址師父、仲要影四周環境、家中擺設、格局」,我答:「風水師最賺錢的唔係幫人睇風水,而係一D風水擺設,妳問清楚$580是否『全包宴』,買埋D擺設要幾錢」,佢答:「$580全包,外加百多元買擺設就OK」。

之後話鋒一轉,佢同我講話有疑慮,我問點解。佢話:「$580是一個cheap plan,所以師父唔會上門,只會叫客仔自己用指南針測方向,影四周同家中的相見師父,師父就幫手睇」,我問:「聽人講風水重座向、氣口,師父有無教妳點樣測方向?」,佢答:「無呀,咩叫氣口呀?」。

講落去,A小姐有好多野聽唔明我講咩,而且師父又唔上門睇,佢開始懷疑師父有無料。但由於係好朋友介紹,又唔好意思推。我建議,B小姐唔約都幫妳約左,見下師父都無妨,聽下佢講咩都好,或者人地真係有料呢?原來師父在深水埗開檔,A小姐叫埋我上去。

入到去,師父睇左D相,問左地址,頂~原來上Google Earth同Google Map,打個地址入去睇,之後問A小姐有無用指南針測過,拎左D度數去,對住部電腦左睇右睇,之後講左個座向出黎,又話A小姐犯煞、小人當道,講左一大對。叫A小姐買左$98擺設,教埋佢擺。

落左樓,A小姐問我見過人咁樣睇風水未。我話都係第一次見人咁樣睇風水。佢話B小姐可能都係俾人呃,我問佢妳認為佢係神棍?佢話係,講D野好大路,全部都係D「阿媽係女人」的廢話,我問佢點算,佢答:咪自己黑仔,破財擋災囉......

[1] 睇風水

[引用] | 作者 睇風水 | 2nd Mar 2012 12:02 | [舉報垃圾留言]